سپهر غصه ده باتان شكسته ماهيم آچ گوزون

گوزومده تار اولوب جهان ايا پناهيم آچ گوزون

حسينه سس وير وفالي قارداش

داريخدي سينم يارالي قارداش

 او ياره لر دگدي كاش منيم بو قلب زاريمه

آخيدي باشيمون قاني قانون كيمي عذاريمه

آخان گوزون دوشن قولون عموديلن سينان باشون

بوكوبله قديمي منيم سالوبلا اود قراريمه

بو داغلي سينم چكور شراره

گـوز آچ حسينـه ائلـه نظاره

 ميان نخلزاريدن سويا گوره يولون دوشوب

كشيده سرولر كيمي تبر دگوب خولون دوشوب

گوزوم دوشنده جسموه باشون كيمي بليم سينوب

نه حاله پيكرون قالوب گوز اوخلانوب قولون دوشوب

سايلمياندي سينـونـده يـاره

سمادي جسمون يارون ستاره

نه تك ئولوبدي قارداشيم اورك يانور عزاليام

نه تك بو عرصه گاهيده آدامسيزام بلاليام

هر عضووه دگوب يارا منيمده قلبيمه

سنان اورك يارا گوروب اوزون كيمي ياراليام

شكسته ني تك اورك سزلدار

گوزه گورنمز اورك يارام وار

 اولوب ايشيم بوگون منيم شكسته قلبي داغلاماق

اورك قانين يارون كيمي سولان جماله باغلاماق

ئولنده اكبر آغلاديم ولي بو حاله قالماديم

گولور قشون من آغلورام نه سختيمش تك آغلاماق

غريب اولانلار بوني بيلرمش

تك آغلياندا عدو گولرميش

 لباس عشقي قلبيدن بوگون سويوب گدنمورم

اوپوپ يارا دگن گوزون گنه دويوب گيدنمورم

عباني سرميشم يره يوخومدي بير نفر كمك

ياراليسان آپارماسام سني قويوب گيدنمورم

بو خسته پيكر گيدور منيله

عزالي روحيم قالور سنيله

غرض دوروب دوشوب يولا حسين آتانمدي قدم

سرشكي آخدي صورته بو سوزلري ايدوب رقم

گيدوم خيامه باش چكوم گوزتليور بالالاريم

اوكي كسيلدي چاره سي علاج سيز قالان منم

حسيني  ايله دعا ابوالفضل

اورگي اولسون رها ابوالفضل

 بير آز گيدور گنه دورور سرشگي صورته آخور

بلا و غصه  رعد تك يارالي قلبينه شاخور

خيامه ساري قصد ايدوب اياقي گلميور گيده

بلينده اللري دونور كنار علقمه باخور

ديور  دمادم   جان  آي يارالي

فلك گور ايتدي سني هارالي

 سني باعث اولدي گيتمدون بو چولده ايلدون وطن

قوم اوسته پيكرون قويوب نجه گيدوم خيامه من

سوروشسالار سوسوزلاريم سو جامي الده خيمه ده

سنون بو حاله قالماقون نجه حسين ايدر علن

بير آيري چاره يوخ ايندي قارداش

خيـامه  گيتمك  چتنـدي  قارداش

التماس دعا - آقای غلامرضا هادی اردبیلی