خبيردور خبر مُنزَلِ رسالته زينب
كفيل دور كرم كوثر ولايته زينب
كتاب مُنزلي تفسير ايدردي آيه به آيه
حجازي لحنيله مشغوليدي تلاوته زينب
چاتوب جلالته زهرا دوشوندن امديگي صوددن
ايدور مفاخرت اول معنوي جلالته زينب
ويروبدي تربيتين فاطمه يتوردي كماله
علي مثالي طرفدار اولوب عدالته زينب
زنان يثربه تعليم ائدردي حكم حجابي
دئيردي موعظه ترغيب ائدردي طاعته زينب
سفير نهضت خونين دولت شهدادور
قويوب رقيّه سيني شاميده سفارته زينب
پيام سرخ شهيداني گوش عالمه سالدي
نه غافل اولدي نه فكر ايتدي استراحته زينب
اولوبدي اهل ولادن، بلادن آيريلا بيلمور
گيوبدي خلعت درد و بلاني قامته زينب
حسينيلن حسنه ، هم باجيدي هم آنا مثلي
محبتين يتوروب نقطة نهايته زينب
اوشاقليقندان عجينيدي روحي ، روح حسينلن
اوزاقلاشاندا دوشردي بير آيري حالته زينب
ديار درد و بلايه حسينله همسفر اولدي
قبول ايدوب غمي امضا وئروب شراكته زينب
نقدري گوردي مصيبت او قدري صبري چوخالدي
ئولن گونه كيمي ديل آچمادي شكايته زينب
قيامتي علن اولدي قيام كرب و بلاده
نيازي يوخ گله بير دفعه ده قيامته زينب
گلر قيامته گلسه شفاعت امرينه خاطر
عزا دوتانلاري قويماز دوشه مرارته زينب
كناره چيخما قلم گوزله رشته چيخاماسين الدن
كوچون چكوب گتوروب هانسي بير ايالته زينب
بلا مسافري دشت بلاده قوردي خيامين
يتيشدي صبح سعادت چاتوب سعادته زينب
كفن گينديروب احرار عشقه يولادي جنگه
گورن ديور بزيوب گوندرور ضيافته زينب
بو فيضيدن ايكي اوغلوندا قويمادي اولا محروم
شرف يولوندا شرافت ويروب شرافته زينب
گوزي باخاباخا قارداشلاري يخيلدي منايه
كمال شوقيله شكر ايليوب شهادته زينب
يارا گورنلري آرام ايدور ياراسيني باغلور
شهيدلرين باشي اوسته گيدور زيارته زينب
جنازه لر قالوب عريان يارالي قانلي مناده
يوخيدي چاره سي محتاجيدي حمايته زينب
قالوبلا نعشلر آتلار اياقي آلتدا چكن يوخ
نه چاره ايلير آخر بو بير عبارته زينب
بو قتلگهده، اوياندان هجوم ايدوبله خيامه
آلشدي خيمه سي تك شعله شرارته زينب
ئوزون يتوردي يانان خيمه گاهه اللري باشدا
سويولدي خيردا اوشاقلار تك اهل غارته زينب
ئولن ئولوبدي، يانان ياندي، غارت اولدي اثاثي
ئوزين خلاصه مهيا ايدوب اسارته زينب
دوباره دن بئلين همتله باغليوبدي قيامه
گيدور تانيتيديرا تا اهلبيتي مردم شامه
اراده ايلدي وئرسون جلا حقيقته زينب
اولوبدي حامل ئوركدن لواي نهضته زينب
چاتينجا قافله شامه يئتوردي خلقه پيامين
يزيد ظلمني اعلان ايدوبدي ملته زينب
هاياندا ائتدي توقف بيلوبدي وقتي غنيمت
حسين كيمي دوروب اقدام ائدوبدي صحبته زينب
نه نوعي داخل شام اولدي كاروان ديه بيلمم
باخوب جماعت بي شرم و پست فطرته زينب
كمال وقريله سسلندي اي جماعت گمراه
دچار اولوب دئميون ريسمان ذلته زينب
علي قيزي بتي سيندرمينجا راحت اوتورماز
گلوب قيام ائلسون گلميوبدي بيعته زينب
كسيلدي قارداشيمون باشي چون اگيلمدي ظلمه
مرامي اوسته نماينده دور او حضرته زينب
قولونكي باغلاديلار ، گر ديلينده باغلاسا دشمن
گوزيله قويماز اهانت اولا شريعته زينب
بو ظالمانه اسارت نماد منزلتيمدي
نه زحمتيله يئتوردي ئوزين بو رتبته زينب
نقدري قوللاري باغلي دولانسا كوچه به كوچه
ياخينلاشور او قدر اوج فضل و عزته زينب
بلا نقدري چكر باشيم استقامتيم آرتار
كه الّلي ايلدي تحمل ايدوب مصيبته زينب
يزيد قصرين حسينيّه ايلمك نظريم وار
ياخين زماندا موفّق اولار بو فرصته زينب
آلار يقين طلقازاده نين قرارين اليندن
سالار وجوديني آتشفشان نفرته زينب
گلوبدي ايليه عيش يزيدي ماتمه تبديل
دانشسا تيشه ورار ريشة حكومته زينب
حريص قدرت اولان مسلمينه رهبر اولانمز
ايدر معرفي فاسق يزيدي ملته زينب
بو قدري طعنه ويروب گولميون مروتوز اولسون
ئولوب امامي ملبّسدي قاره كِسوَته زينب
دئيون جوانلاروز ال چالماسون جواني ئولن وار
يانور جواني ئولنلر مثالي محنته زينب
الي حنالي گلينلر دايانماسونلا يول اوسته
طويي عزايه دونن وار دوشوبدي خجلته زينب
خانملاري كه قوجاقينه شيرخواره آلوبلار
اولاري دعوت ايدور راه و رسم حرمته زينب
ديل آچميان بالاسي اوخلانان بو جمعده واردي
او آغلادوقجا گلور شرحه شرحه رقته زينب
جواهراتوزي گوسترميون تفاخر اوزيلن
چاتوبدي معنويت عالمينده زينته زينب
سلاح نطقي شراره چكوبدي شام فضاسين
هماي صحبتي مينديردي اوج سرعته زينب
يزيدي بير نفر اوضاع شهره باخبر ايتدي
كه شامياني سالوب خطبه سيله حيرته زينب
بير آزدا ويرسه ادامه خلافتون گيدر الدن
سالار وجودوي شام ايچره رعب و وحشته زينب
حقارتيله ديدي باشلاري هوايه اوجالدون
باخوب او باشلارا بلكه دوشه اذيته زينب
خانم گوروب گنه ظلم اهلي ظلمي باشلياجاقلار
دانشسا باشلاري نوك جداده داشلياجاقلار
سكوتيدن صورا الده مگر نه چاره سي واردي
جدالر اوسته نئچه ياره لي ستاره سي واردي
تمام كوچه و بازاري آج سوسوز دولانوبلار
اوركده هاموسينين داغي، باشدا قاره سي واردي
امير قافله امر ايتدي كاروان گيده قصره
خليفه نون بو فتوحاته جشنواره سي واردي
كيم اعتراض ايده دستوريدور ديلين كسه جكلر
جنازه سينه ده قصاب لر قناره سي واردي
كشان كشان اسرا كاخ ظلمه داخل اوبلار
عيان اولور چوخونون سينه ده شراره سي واردي
طنابه باغلي يزيدين مقابلينده دوروبلار
يزيدين اونلارا تحقريلن نظاره سي واردي
عروس فاطمه روبند ايدوبدي زلفين عذاره
نه معجري نه قولاقينده گوشواره سي واردي
غرور ئوزيله معاويه نين او ناخلف اوغلي
ايدوبدي تكيه او تختيكي خوش نگاره سي واردي
يارالي باشلارين حامللرين مخاطب ايدوبدي
عزيز فاطمه نين باشينه اشاره سي واردي
دوداقي ياره لي بير قانلي باش قويولدي قباقه
كه زينبين اوباشا عشق بي شماره سي واردي
غروريلن ال آتوب چوب خيزراني گوتوردي
او راس اطهر ايچون كينة دوباره سي واردي
يارالي لبلري چوبيله بير اويان بويان ايتدي
دئدي بو باشين عجب گويچك آرواره سي واردي
تصور ايله نئجه خيزران اوجالدي هوايه
اننده ئوپدي او لبدن كه جان عصاره سي واردي
يزيد بيلمور او گل كي دروبله شاخه سي اوسته
هزار مرتبه ناز ايلين هزاره سي واردي
همان هزاره گلوب ناليه دئدي بي بي قويما
منيم گولومدي اونون شبنم بهاره سي واردي
اگر چه چهره سي پنهاندي قرمزي بولوط آلتدا
مه شرفدي كه محنتلي ماهپاره سي واردي
او باش كه اشرف پيغمبرانه پارة تندي
بلالي چولده اونون جسم پاره پاره سي واردي
اوباش كه قرمزي قانلا اولوبدي آغ يوزي رنگين
اونون اسيريدي بير دسته بختي قاره سي واردي
او باشي يول بويي چوخ اينجدوبله كوفه و شامين
نقدري كينه لي سربازي يا سواره سي واردي
او باش كسيلدي ولي قانلي لبلرينده هميشه
حقيقت اهلينه پيغام البشاره سي واردي
او باش موذن توحيد اولوبدي نيزه باشيندا
اذان عزتينون نيزه دن مناره سي واردي
بي بي اونون عوضينده دئينن رقيه ني ئولدور
او باشي ويرما گورورسن دوداقدا ياره سي واردي
اونون رقيه سينون ناله سي سالار سني تختدن
گوره له آه يتيمون نئجه شراره سي واردي
مرامون اوسته «فتح الهي» استقامتون اولسون
اگرچه سختيدي يوللاري سنگخاره سي واردي
دوز عاشق اولگيلان ئولسونده زنده باد يازيلسون
دوز عاشق ئولسه ده تجليل و يادواره سي واردي
مَثلدي بو رَسن عشق هر بيلنگه دولانماز
بوتون جهان اولا عاشق حسين و زينب اولانماز
دانلود مداحی های آذری از مداحان مختلف